CSIF, UGT Servizos Públicos e a Área Pública de CCOO inician hoxe xoves mobilizacións en todo o Estado, baixo o lema «Negociación, suba salarial e mellora dos servizos públicos», co obxectivo de esixir ao Ministerio de Transformación Dixital e da Función Pública o inicio da negociación colectiva e un novo acordo salarial para as empregadas e os empregados públicos, que poña fin á conxelación retributiva que lles afecta desde comezos deste ano.
No caso de Madrid, está prevista unha concentración fronte ao Ministerio de Transformación Dixital e da Función Pública, mentres que no resto de España se organizarán protestas diante das delegacións e subdelegacións do Goberno. As mobilizacións reclaman servizos públicos de calidade, incrementos salariais, máis emprego e melloras nas condicións laborais para máis de tres millóns e medio de traballadoras e traballadores públicos.
Xa no pasado mes de setembro, as tres organizacións —que representamos máis do 80 % do persoal público— advertimos que, se non se retomaba a negociación de maneira inmediata, adoptaríanse as medidas que se considerasen oportunas. O desenvolvemento e intensificación das protestas dependerán da vontade e decisión do ministro para negociar. Tal e como xa se comunicou, non se descarta ningunha acción ou medida de presión, incluída a folga xeral.