Curso de Canva organizado por CSIF Ensino

Este sábado 25 de outubro tivo lugar o curso de iniciación a Canva, organizado por CSIF Ensino Galicia, no que participou un numeroso grupo de docentes interesados en mellorar as súas competencias dixitais e creativas.

A xornada, de carácter básico, estivo orientada a coñecer desde os elementos fundamentais da plataforma Canva —como o uso de plantillas, tipografías, cores corporativas e composición visual— ata ferramentas máis avanzadas como o Magic Media e outras funcións baseadas en intelixencia artificial, que permiten xerar imaxes, deseños e contidos de forma automática.

O curso resultou moi completo e dinámico, combinando explicacións prácticas co deseño de materiais educativos, carteis e presentacións adaptadas ao ámbito docente.

Como broche final, desenvolveuse un concurso en Quizizz no que o profesorado participante demostrou o aprendido ao longo da xornada. Os cinco mellores resultados foron premiados con agasallos.

Desde CSIF Ensino agradecemos a participación e interese do profesorado asistente, así como a boa acollida desta iniciativa formativa. Seguiremos ofrecendo propostas que impulsen a formación continua e o uso de ferramentas dixitais no ensino.