CSIF analiza o borrador da nova Lei e reclama avances en ratios e horario lectivo

A representante de CSIF Ensino Galicia, Rosa Silva, participou os días 24 e 25 de setembro en Madrid no Comité Executivo de CSIF Educación, onde se analizou o borrador do anteproxecto de Lei presentado polo Ministerio de Educación, FP e Deportes.

O Comité concluíu na necesidade urxente de contar cunha normativa básica que regule as condicións do profesorado en todo o territorio, sen limitar as negociacións propias das comunidades autónomas.

Así mesmo, sinalouse que por primeira vez parece abrirse un camiño real cara ao establecemento dun horario lectivo máximo e á redución xeneralizada das ratios, cuestións consideradas fundamentais para mellorar a calidade educativa.

Finalmente, o Comité Executivo insistiu en que non se pode dilatar a negociación destes avances, que deben servir como punto de partida para continuar con outras melloras imprescindibles: retribucións xustas, carreira profesional, adaptación dos niveis á titulación e reforma do sistema de acceso.