Continúan sen acordo as negociacións de CSIF e das demais organizacións sindicais co SERGAS, que volverán reunirse o próximo venres

CSIF, xunto ás organizacións sindicais CIG-Saúde, CCOO e UGT, informa de que, tras a segunda reunión mantida co SERGAS, aínda non se acadou un acordo, polo que as negociacións permanecen abertas, así como a convocatoria de mobilizacións . A principal discrepancia continúa sendo a regulación das prazas FEAP, para as que o comité solicita garantías sobre a retirada da categoría e a reconversión das prazas existentes.

Proposta trasladada polo SERGAS

Na reunión de hoxe, o SERGAS expuxo unha proposta que inclúe as seguintes medidas:

• Consolidación do transporte para a atención domiciliaria.

• Retribución das prolongacións de xornada do persoal dos PAC en función do modelo de prolongación realizado.

• Redución do tramo incentivado de xornada complementaria nos PAC, pasando de 160 a 140 horas.

• Equiparación do valor da xornada complementaria das enfermeiras e enfermeiros dos PAC co persoal de atención ordinaria.

• Incremento do complemento de manutención nos PAC.

Para o comité, estes movementos son “insuficientes” e non abordan os aspectos esenciais. Acusan ao SERGAS de “adiar deliberadamente solucións urxentes” mediante referencias xenéricas a estudos ou prazos, sen medidas concretas.

A próxima reunión terá lugar o venres 21 e estará centrada na xornada dos PAC. CSIF e o resto das organizacións insistirán en avanzar nun marco claro e xusto de cálculo da xornada, evitando calquera fórmula que supoña a perda de horas ou de tempos de descanso para o persoal.