O persoal sanitario mobilízase para reclamar melloras na Atención Primaria

Delegadas e delegados de CSIF, xunto a CIG, CCOO e UGT, concentráronse esta mañá fronte á Consellaría de Sanidade en Santiago de Compostela para esixir medidas urxentes que reverta a situación límite da Atención Primaria e garantir condicións laborais dignas para todas as categorías profesionais. Esta acción enmárcase na segunda xornada de mobilizacións que preceden á folga conxunta convocada para o 26 de novembro, á que está chamado todo o persoal da Atención Primaria.

As organizacións lembraron que as protestas continuarán este xoves con concentracións de 15 minutos ás 11:00 e ás 18:00 horas nos centros de saúde e PAC.

Desde CSIF, as súas delegadas e delegados destacaron que as propostas trasladadas por Sanidade na Mesa Sectorial aínda resultan insuficientes e poden comprometer tanto a organización da Atención Primaria como as condicións laborais do persoal e a calidade asistencial que recibe a cidadanía, polo que a convocatoria de folga segue en pé, estando prevista a reanudación das negociacións coa administración este venres.

As organizacións sindicais fixeron un chamamento á cidadanía para que comprenda a necesidade destas mobilizacións, lembrando que están orientadas a garantir un servizo público de calidade. Ademais, aseguraron que durante todas as xornadas de protesta e folga estarán garantidos os servizos esenciais, como corresponde nun ámbito tan sensible como o sanitario.