Delegados de CSIF Ensino, desaloxados por segundo día consecutivo das dependencias da Consellería

Delegados de CSIF Ensino, xunto con representantes dos demais sindicatos contrarios ao pacto asinado pola Xunta con CC.OO, UGT e ANPE, foron desaloxados pola policía por segundo día consecutivo das dependencias da Consellería mentres agardan para ser recibidos polo conselleiro, Román Rodríguez, para renegociar o acordo.

Rosa Silva, como portavoz de CSIF, lamenta esta actitude do conselleiro e advirte que transmite unha mensaxe moi negativa á sociedade, xa que está a negar o diálogo aos representantes de máis do 60% da comunidade docente.

Silva recorda que levan desde o día 2 de novembro agardando a que Román Rodríguez fixe unha data para sentarse a negociar, "houbo tempo suficiente para unha resposta, de aí que optaramos por presentarnos directamente na consellería e non cesaremos ata conseguir, pois é o que o profesorado ao que representamos espera de nós".

CSIF, asegura, é unha organización que se caracteriza polo talante negociador e o diálogo, pero "esgotamos todos os camiños para solicitar unha reunión, por iso agora estamos aquí, en dependencias que son de toda a cidadanía, non propiedade de Román Rodríguez, polo que fai ainda máis incomprensíbel o trato que se nos está a dar".

Esta é a segunda xornada consecutiva na que os representantes sindicais de CSIF, CIG e STEG son desaloxadas pola Policía mentres agardan ás portas do despacho do conselleiro que se lles confirme unha cita para poder reunirse.