CXT 26/27: publicada a convocatoria

A convocatoria comprende os seguintes corpos:

• Mestres.
• Catedráticos e profesorado de ensino secundario.
• Catedráticos e profesorado de escolas oficiais de idiomas.
• Catedráticos e profesorado de música e artes escénicas.
• Catedráticos e profesorado de artes plásticas e deseño.
• Profesorado especialista en sectores singulares de formación profesional.
• Profesorado técnico de formación profesional, a extinguir.
• Mestres de taller de artes plásticas e deseño.
• Inspectores ao servizo da Administración educativa e inspectores de educación.

Participación voluntaria: con carácter xeral, o persoal funcionario con destino definitivo poderá participar se, ao rematar o curso 2026/27, transcorreron polo menos dous anos desde a toma de posesión do último destino definitivo. A base décimo terceira regula tamén os supostos de servizos especiais, excedencia e outras situacións.

Participación obrigatoria: inclúe, entre outros supostos da base décimo cuarta, persoal con destino provisional sen primeiro destino definitivo, persoal suprimido ou desprazado por falta de horario, determinados reingresos e o persoal funcionario en prácticas que superou o procedemento selectivo de ingreso convocado pola Orde do 18 de febreiro de 2026.

Cómpre revisar as condicións de cada modalidade: a convocatoria establece excepcións e consecuencias específicas para quen non participe ou non formule peticións suficientes.

1. Accede á aplicación do concurso de traslados para cubrir a solicitude e revisar as peticións e o baremo.
2. Presenta a solicitude por medios electrónicos na sede electrónica da Xunta, mediante o procedemento ED012A. Admítense os sistemas de identificación e sinatura da sede, incluído Chave365.
3. Comproba a presentación e conserva o xustificante do rexistro electrónico.

Presentarase unha única solicitude por corpo, aínda que se participe por varias especialidades ou se pidan prazas de distintas administracións educativas. Se se presenta máis dunha solicitude do mesmo tipo, só se admitirá a última rexistrada na sede electrónica.

Se o expediente está actualizado e estás conforme: non é necesario volver xustificar os datos e méritos que xa constan nel. Revisa na solicitude a puntuación total e por apartados.

Se faltan datos ou méritos: ademais da solicitude do concurso (ED012A), debes presentar a solicitude de actualización e/ou modificación do expediente (ED011A), coa documentación xustificativa, ata o 26 de novembro de 2026.

Para os apartados de valoración pola Comisión de Avaliación —6.1 e 6.3 do anexo XVII e 4.1 do anexo XVIII— a orde prevé opcións para acollerse á puntuación anterior, alegar novos méritos ou solicitar unha nova valoración. Revisa a opción que corresponda á túa situación.

Como regra xeral, os requisitos e os méritos deben reunirse ao rematar o prazo de solicitudes, sen prexuízo das excepcións previstas na convocatoria.

• Anexo XVII: baremo dos corpos docentes.
• Anexo XVIII: baremo de inspección educativa.

• Podes combinar peticións a centros concretos e a localidades, ata un máximo de 300 peticións.
• A petición de localidade comprende os centros segundo a orde dos anexos, coas excepcións da convocatoria.
• Os colexios rurais agrupados (CRA) deben solicitarse expresamente polo código do centro: non están incluídos na petición de localidade.
• Para PTFP, a extinguir, e sectores singulares de FP, os centros de educación especial tamén requiren petición expresa polo código do centro.
• Nas prazas itinerantes e nas que se impartan en lingua estranxeira debes marcar o perfil correspondente. Se queres pedir as dúas modalidades, debes formular peticións diferenciadas.
• As prazas plurilingües requiren acreditar, como mínimo, un B2 no idioma correspondente.
• Determinadas especialidades esixen acreditar o coñecemento do galego nos termos da base décimo segunda.

O persoal procedente de PTFP debe comprobar o código de participación 590 ou 598 que corresponda ás especialidades polas que concursa.

O persoal en prácticas incluído na base décimo cuarta.1.g participa, como regra xeral, con cero puntos e pola orde do seu nomeamento.

A orde recolle unha excepción para determinados supostos de segundo ano de prácticas por permisos de nacemento, adopción, garda ou acollemento que impedisen superar a fase de prácticas no primeiro ano.

A toma de posesión do destino obtido estará condicionada á superación das prácticas e ao nomeamento como persoal funcionario de carreira.

A convocatoria regula os dereitos preferentes a centro, localidade ou zona para os supostos establecidos nas súas bases.

Tamén contempla o dereito de concorrencia, coas condicións específicas que deben cumprir as persoas que participen conxuntamente por esta modalidade.

Se estás nun destes supostos, revisa as bases correspondentes antes de cubrir a solicitude e ordenar as túas peticións.

As vacantes provisionais e definitivas publicaranse no Portal Educativo antes das respectivas adxudicacións.

As relacións de centros dos anexos non equivalen a unha oferta de vacantes en todos eles.

A adxudicación provisional publicarase no Portal Educativo. A resolución definitiva publicarase no DOG e na páxina web da Consellería.

Tras a publicación da adxudicación provisional abrirase un prazo de 10 días hábiles, contados desde o día seguinte á publicación, para presentar reclamacións por medios electrónicos.

No mesmo prazo poderá presentarse a renuncia á participación, nos termos previstos na base trixésima. A renuncia afecta a todas as peticións e especialidades da solicitude e debe realizarse na aplicación do concurso e presentarse electronicamente mediante o trámite habilitado na Carpeta cidadá.

Os destinos adxudicados na resolución definitiva son irrenunciables.

A toma de posesión dos novos destinos terá efectos administrativos do 1 de setembro de 2027.