Galicia - Educación

Publicadas as instrucións para o desenvolvemento das ensinanzas de educación infantil, educación primaria, educación secundaria obrigatoria e bacharelato no réxime ordinario no curso académico 2026/27

antonio.ventura.paz — Tue, 23 Jun 26 16:56:00 CEST

Últimas noticiasGalicia - Educación Image

Publicada a resolución con instrucións para o desenvolvemento das ensinanzas de educación infantil, primaria, ESO e bacharelato.

Información destacada

A Consellería publicou a Resolución do 11 de xuño de 2026, da Dirección Xeral de Ordenación e Innovación Educativa, pola que se ditan instrucións para o desenvolvemento das ensinanzas de educación infantil, educación primaria, educación secundaria obrigatoria e bacharelato no réxime ordinario no curso académico 2026/27.

A resolución marca as directrices para a planificación e xestión do funcionamento dos centros de cara ao novo curso académico.

Descargar resolución (PDF)

👦 Infantil e Primaria

Instrucións relativas á organización e ao desenvolvemento do currículo nestas etapas educativas.

📚 ESO e Bacharelato

Directrices e pautas xerais para o correcto desenvolvemento da Educación Secundaria Obrigatoria e o Bacharelato.

🏫 Curso 2026/27

Pautas organizativas xerais para os centros educativos de réxime ordinario de cara ao vindeiro curso académico.

Obxecto e ámbito de aplicación

Esta resolución ten por obxecto ditar as instrucións precisas para garantir unha adecuada organización do novo curso:

Afecta ao desenvolvemento das ensinanzas de educación infantil, educación primaria, educación secundaria obrigatoria e bacharelato.
É de aplicación nos centros docentes que imparten estas ensinanzas no réxime ordinario na Comunidade Autónoma de Galicia.

Organización académica

O documento detalla de maneira xeral todos os aspectos crave do vindeiro curso escolar:

Establécense as directrices para a elaboración dos horarios e a xestión dos diferentes recursos dispoñibles no centro.
Achega as pautas necesarias para a metodoloxía, atención á diversidade e os procesos de avaliación do alumnado.
Inclúe normativa para o desenvolvemento dos proxectos educativos dos centros e programacións didácticas.

Información de interese para os centros

A resolución establece os marcos xerais de organización de tódalas ensinanzas para garantir o correcto desenvolvemento do curso escolar e a calidade educativa.

CSIF Ensino Galicia recomenda aos equipos directivos e a todo o profesorado revisar con detalle estas instrucións para unha correcta planificación e inicio do curso académico 2026/27.

Publicada a Resolución na que se recollen as instrucións sobre a xornada semanal docente 2026/27

antonio.ventura.paz — Wed, 17 Jun 26 19:03:00 CEST

Negociaciones y acuerdosÚltimas noticiasGalicia - Educación Image

A Consellería publica as instrucións que desenvolven medidas recollidas no acordo asinado por CSIF, CCOO Ensino, ANPE e UGT.

Un avance froito do acordo sindical

A publicación destas instrucións supón a concreción para o curso 2026/27 de medidas recollidas no acordo de mellora do ensino público galego asinado por CSIF, CCOO Ensino, ANPE e UGT.

Entre os aspectos máis relevantes está a recuperación das 18 sesións lectivas como referencia xeral en Secundaria e ensinanzas equivalentes, así como unha mellor regulación das sesións complementarias, gardas, coordinacións e funcións docentes.

Descargar resolución oficial Ver publicación da Consellería

🕒 Xornada semanal

Regúlase a distribución da xornada docente para o curso 2026/27.

📚 18 sesións

As 18 sesións lectivas recupéranse como referencia xeral en Secundaria e ensinanzas equivalentes.

🤝 Acordo sindical

Medidas derivadas do acordo asinado por CSIF, CCOO Ensino, ANPE e UGT.

Educación Infantil e Educación Primaria

A xornada semanal do persoal docente de Infantil e Primaria queda configurada do seguinte xeito:

Tipo de horario	Duración
Presenza no centro con carácter lectivo	23 horas
Presenza no centro con carácter non lectivo	5 horas
Non obrigada presenza no centro	9,5 horas
Total	37,5 horas

As gardas, gardas de recreo e gardas de transporte escolar computarán como horario con carácter lectivo.
O horario non lectivo con presenza no centro poderá destinarse a coordinacións, dinamizacións, sesións de avaliación, gardas non lectivas e outras funcións.
O horario de non obrigada presenza no centro destinarase á formación, preparación de actividades docentes e outras tarefas propias da función docente.

Secundaria, FP, ensinanzas artísticas, idiomas, deportivas e persoas adultas

Un dos principais avances derivados do acordo é a recuperación das 18 sesións lectivas como referencia xeral.

Tipo de horario	Duración
Sesións lectivas fixas	18 sesións
Sesións complementarias fixas	5 sesións
Permanencia non fixa no centro	7 horas
Non obrigada permanencia no centro	7,5 horas
Total	37,5 horas

Importante: non se xeneralizan as 19 ou 20 sesións. A excepcionalidade queda limitada a casos concretos e con compensación horaria.

Excepcionalidade nas sesións lectivas

A posibilidade excepcional de superar as 18 sesións lectivas xa existía na normativa anterior. A diferenza é que agora se recuperan as 18 como referencia xeral e se introducen garantías máis claras.

19 sesións lectivas: compensación con 2 sesións complementarias fixas.
20 sesións lectivas: compensación co axuste correspondente das sesións complementarias.
No caso de impartir materias afíns, a excepcionalidade require conformidade do profesorado afectado.
A medida debe contar coa autorización do Servizo Territorial de Inspección Educativa.

Sesións complementarias e permanencia no centro

As 5 sesións complementarias de permanencia fixa distribuiranse, con carácter xeral, do seguinte xeito:

1 sesión de titoría para atención de familias e alumnado.
4 sesións para gardas e/ou outras funcións non lectivas segundo determine a dirección do centro.

As 7 sesións de permanencia non fixa poderán destinarse, entre outras, a:

Reunións de departamento, equipos docentes, equipo directivo ou órganos colexiados.
Sesións de avaliación.
Coordinación pedagóxica.
Titorías e orientación ao alumnado.
Coordinacións e dinamizacións de plans e proxectos.
Actividades complementarias e extraescolares.
Formación programada pola Consellería.

Equipos directivos, coordinacións e outras funcións

A resolución tamén regula asignacións horarias para equipos directivos e para diferentes funcións de coordinación, dinamización e participación en programas educativos.

Coordinación de convivencia e benestar.
Programas plurilingües, seccións bilingües e auxiliares de conversa.
Biblioteca escolar e PLAMBE.
Dinamización da lingua galega.
Coordinación TIC e E-Dixgal.
Polos Creativos, STEMBACH, programas internacionais e Club de Ciencias.
Actividades complementarias e extraescolares.
Formación do profesorado e FCT.

CSIF Ensino: o acordo permite recuperar dereitos

CSIF Ensino lembra que estas instrucións son consecuencia do acordo asinado por CSIF, CCOO Ensino, ANPE e UGT, que permitiu avanzar na recuperación de condicións laborais do profesorado galego. Seguiremos vixiantes para que a súa aplicación nos centros respecte o espírito do acordo e garanta unha organización horaria equilibrada.

CSIF Ensino Galicia seguirá informando das novidades relacionadas coa organización do curso 2026/27 e coas condicións laborais do persoal docente.

DO BULO AO DATO!

antonio.ventura.paz — Fri, 15 May 26 17:50:00 CEST

Últimas noticiasGalicia - Educación Image

DO BULO AO DATO

Información con rigor sobre o acordo de mellora do ensino público galego. Fronte ao ruído, ás interpretacións interesadas e ás mensaxes alarmistas, desde CSIF Ensino achegamos contexto, datos e explicacións verificables.

📌 Serie informativa de CSIF Ensino Galicia

Nos últimos tempos están a circular polos centros educativos e polas redes sociais múltiples interpretacións interesadas sobre as medidas levadas á Mesa Sectorial de Educación.

Con esta serie de publicacións queremos desmontar falsidades, aclarar dúbidas e explicar con rigor o contido real do acordo e das medidas negociadas.

Porque o profesorado merece información contrastada, explicacións completas e menos ruído.

📍 Bulo 1 · Quen dá leccións sobre negociación colectiva?

❌ O que se intenta trasladar:
Que se está vulnerando a negociación colectiva e que determinadas organizacións son as únicas defensoras da representación sindical.

✅ O dato:
Na propia Mesa Sectorial de Educación, o sindicato que apelaba continuamente á súa representatividade maioritaria decidiu finalmente asistir con menos da metade das representantes que lle correspondían.

Resulta contraditorio denunciar constantemente unha suposta vulneración da negociación colectiva e, ao mesmo tempo, non ocupar plenamente os espazos de representación dispoñibles no principal órgano de negociación.

📌 O profesorado merece información rigorosa, non relatos interesados nin ruído permanente.

📍 Bulo 2 · A excepcionalidade das 18 sesións é algo novo?

❌ O que se está dicindo:
Que a posibilidade excepcional de superar as 18 sesións lectivas aparece agora por primeira vez co novo acordo.

✅ O dato:
A excepcionalidade xa existía na normativa de Secundaria de 1987, 1997, 2011 e 2012, e tamén aparece no propio proxecto estatal de redución de ratios e xornada.

A diferenza fundamental é que agora:

✔️ Recupéranse as 18 sesións lectivas como referencia xeral.
✔️ A excepcionalidade pasa a ser voluntaria para quen imparta materias afíns.
✔️ Introdúcese unha compensación máis garantista.

Se excepcionalmente se supera o límite:

Cada sesión lectiva de exceso compénsase con dúas sesións complementarias.
Primeiro redúcense complementarias fixas.
E só cando estas se esgotan, redúcense complementarias non fixas.

📌 Non se xeneralizan as 19 ou 20 sesións. As 18 recupéranse como norma xeral e mellóranse as garantías para os casos excepcionais.

📍 Bulo 3 · Cal era realmente o punto de partida?

❌ O ruído:
Presentar a situación galega como equivalente á doutras comunidades sen explicar as diferenzas reais de organización horaria.

✅ O dato:
En Galicia as sesións son de 50 minutos, mentres noutros territorios son de 55 ou 60 minutos.

A pesar de ter 20 sesións lectivas, Galicia contaba coa permanencia fixa no centro máis baixa do Estado.

O obxectivo da negociación era:

✔️ Baixar a 18 sesións lectivas.
✔️ Manter a duración actual das sesións.
✔️ Conservar unha permanencia fixa reducida.

📌 Menos ruído. Máis contexto. Máis datos.

📍 Bulo 4 · Galicia pasa a ter o mellor horario lectivo en ESO e Bacharelato?

❌ O que se intenta transmitir:
Que o acordo non supón unha mellora real das condicións horarias do profesorado galego e que Galicia seguiría en peor situación ca outras comunidades autónomas.

✅ O dato:
Cos datos enriba da mesa, a proposta levada á Mesa Sectorial sitúa Galicia á cabeza do Estado en condicións horarias para o profesorado de ESO e Bacharelato.

Falamos de 18 sesións lectivas semanais de 50 minutos, é dicir, 900 minutos lectivos á semana.

Existe a excepcionalidade para chegar ás 20 sesións, si, porque é necesaria para a organización dos centros e porque xa existía desde 1987.

Pero agora engádense garantías claras:

✔️ Por cada sesión lectiva extra redúcese a permanencia no centro en dúas sesións.
✔️ De chegar ás 20 lectivas, non habería gardas de ningún tipo.
✔️ Tamén se consegue evitar esa excepcionalidade para quen imparta materias afíns.

Para valorar con rigor o horario docente non chega con mirar só o número de sesións lectivas. Hai que comparar tamén a duración de cada sesión e a permanencia fixa no centro.

E aí Galicia tamén sae gañando: entre 23 e 20 sesións de permanencia fixa no centro.

📌 Menos minutos lectivos, menor permanencia fixa e máis garantías. Galicia pasa a situarse á cabeza en condicións horarias para ESO e Bacharelato.

Un Acordo para mellorar o ensino público galego

antonio.ventura.paz — Thu, 30 Apr 26 17:30:00 CEST

Últimas noticiasGalicia - Educación Image

Os últimos días foron intensos no ensino público galego.

O pasado 24 de abril, CSIF, CCOO Ensino, ANPE e UGT-SP anunciamos coa Consellería unha proposta consensuada de medidas que entrarán en vigor o 1 de setembro de 2026, tras o seu paso polos órganos de negociación.

En novembro de 2025 reunímonos todas as organizacións sindicais con representatividade para analizar a situación e buscar a unidade sindical. Esa unidade non foi posible, tal e como CSIF informou no seu momento.

CSIF, valorando a situación xerada, decidiu optar pola vía da negociación, pois naquel momento vimos a posibilidade de lograr melloras para todos os sectores do ensino, como foi sempre a nosa prioridade.

A folga é unha ferramenta lexítima, pero non pode ser un fin en si mesma. Os últimos 18 anos demostraron que as posturas de máximos e a mobilización sen vontade negociadora non dan resultados.

O obxectivo do sindicalismo é claro: abrir negociacións, desbloquear situacións e conseguir melloras reais para o profesorado e para o conxunto do sistema educativo.

E iso é o que facemos: acordar medidas que se traducirán en cambios efectivos nas aulas e no día a día do profesorado galego.

Un paso histórico para o ensino público galego

antonio.ventura.paz — Fri, 24 Apr 26 13:11:00 CEST

Últimas noticiasGalicia - Educación Image

CSIF Ensino Galicia valora positivamente o novo avance no desenvolvemento do Acordo sobre medidas de mellora do sistema educativo público non universitario de Galicia, que permitirá implementar novas medidas estruturais a partir do 1 de setembro de 2026.

Este novo paso responde á necesidade de adaptar a organización do sistema educativo ás demandas actuais e futuras, e supón un avance de carácter histórico na mellora das condicións laborais do profesorado e na calidade do ensino público galego.

Froito do diálogo e do traballo constante entre CCOO Ensino, ANPE, UGT-SP e CSIF coa Consellería de Educación, nas vindeiras semanas está previsto que pase polos órganos correspondentes de negociación unha proposta normativa para facer efectivas novas medidas recollidas no acordo.

✅ Medidas previstas para o 1 de setembro de 2026

Recuperación das 18 sesións lectivas, con 23 sesións de permanencia fixa semanal no centro, para Secundaria, Bacharelato, FP e ensinanzas de réxime especial.
Recoñecemento da función titorial, por primeira vez, con redución do horario lectivo para esta función.
Incremento da dotación horaria dos equipos directivos, en atención ás súas funcións cada vez máis esixentes.
Reforzo da atención á diversidade mediante a modificación dos catálogos de Infantil e Primaria, sen actualizar desde 2007, para incrementar de forma estable o profesorado de Audición e Linguaxe e Pedagoxía Terapéutica.
Dotación de máis persoal de Orientación e profesorado especialista de atención á diversidade para os centros que máis o precisen.
Adianto ao curso 2028-2029 do calendario previsto para a redución progresiva de ratios en Secundaria.

📌 Un acordo con avances xa visibles nos centros

Este anuncio dá continuidade ao camiño iniciado coa sinatura do Acordo en 2023, que xa permitiu recuperar e mellorar aspectos clave do sistema educativo público galego.

Evitouse o peche de centos de aulas.
Consolidouse emprego docente, cun saldo positivo de máis de 650 docentes no sistema.
Reduciuse o horario lectivo en Infantil e Primaria ata as 23 sesións.
Melloráronse as retribucións do profesorado.
Avanzouse na redución de ratios e na súa adaptación á realidade do alumnado.
Introducíronse melloras organizativas para unha atención máis axeitada á diversidade.

Unha resposta fronte ao descenso demográfico

Nun contexto de forte descenso demográfico, os avances derivados do acordo permitiron non só frear recortes, senón tamén mellorar as condicións de ensino e aprendizaxe nos centros educativos galegos.

Diálogo, negociación e unidade sindical

CSIF destaca que estes avances son resultado dunha unidade sindical real das organizacións asinantes do Acordo, que continuaron traballando de maneira constante, seria e discreta, tanto no ámbito intersindical como na interlocución coa Administración.

Esta unidade sindical sempre estivo e continúa aberta a novas incorporacións.

A vía que permite acadar melloras reais

CSIF recoñece o compromiso do profesorado e da comunidade educativa na defensa dun ensino público de calidade. As mobilizacións e as folgas son ferramentas lexítimas de acción sindical, mais a súa utilidade reside en abrir e consolidar espazos reais de negociación.

A experiencia destes anos demostra que, fronte á confrontación estéril, o diálogo, a negociación e a unidade sindical permiten acadar melloras reais, duradeiras e transformadoras para o sistema educativo.

Desde CSIF Ensino Galicia seguiremos traballando con responsabilidade e determinación para continuar mellorando as condicións do profesorado e reforzar o sistema educativo público galego.

Información elaborada por CSIF Ensino Galicia a partir do comunicado sindical sobre o desenvolvemento do Acordo sobre Medidas de Mellora.

O Goberno aproba a redución das ratios de alumnado e do horario lectivo máximo para todo o Estado: CSIF pide acelerar a implantación e un maior esforzo para garantir a atención á diversidade.

antonio.ventura.paz — Tue, 11 Nov 25 22:58:00 CET

Últimas noticiasGalicia - Educación Image

A Central Sindical Independente e de Funcionarios (CSIF), sindicato máis representativo nas administracións públicas, valora positivamente que o Goberno aprobe en primeira volta o anteproxecto de lei educativa, reducindo a ratio de alumnado en Primaria e Secundaria e tamén as horas lectivas semanais do profesorado. CSIF reclama aos grupos parlamentarios que teñan en conta as necesidades reais do sistema educativo para que esta medida se implante de maneira inmediata. Ademais, esiximos que se comece a traballar para a redución das ratios nas demais etapas educativas.

En relación coas ratios, redúcese o número máximo de alumnos por aula: 22 en Primaria fronte aos 25 actuais; e 25 en Educación Secundaria Obrigatoria (ESO) fronte aos 30 actuais. Nos centros sostidos con fondos públicos, o alumnado con necesidades educativas especiais (NEE) computará como dúas prazas.

Cambios vixentes dende o próximo curso

O calendario de aplicación prevé que a nova xornada lectiva e a consideración dobre do alumnado NEE entren en vigor no curso 2026/2027. As novas ratios comezarán a implantarse de forma progresiva: no curso 2027/2028 en Infantil e Primaria; en 2028/2029 en Secundaria; e en 2029/2030 en Bacharelato, acadando a súa aplicación completa no curso 2031/2032.

O texto do anteproxecto de lei continuará a súa tramitación ata a aprobación definitiva como proxecto de lei e a súa remisión ás Cortes Xerais. Durante este proceso, o texto será sometido a negociación coas organizacións sindicais e coas comunidades autónomas. Neste sentido, CSIF traballará para que as comunidades poidan reducir aínda máis estas horas, esixindo os cupos necesarios que garantan un máximo de 18 horas lectivas en Secundaria e 23 en Primaria.

Máis especialistas en atención á diversidade

O sindicato considera que continúa pendente a regulación dos especialistas en atención á diversidade (orientadores, mestres de Pedagoxía Terapéutica e Audición e Linguaxe). CSIF esixe ao Ministerio que estableza ratios máximas para estes profesionais, seguindo estándares como a recomendación da UNESCO de un orientador por cada 250 alumnos. O último informe TALIS evidencia as dificultades de España na atención a este alumnado, o que reforza a urxencia de actuar neste ámbito.

CSIF esixe que este proceso non se paralice e que se continúe traballando para incluír todas as cuestións que deben formar parte dun Estatuto Docente: mellora das retribucións, reforma do acceso á función docente, carreira profesional, permisos e licenzas, dignificación da labor docente, xubilacións e todas as medidas necesarias para regular a carreira profesional do profesorado dende o seu ingreso ata a súa retirada.

O 30 de outubro únete ás nosas movilizacións!!

antonio.ventura.paz — Tue, 21 Oct 25 15:33:00 CEST

Últimas noticias

Únete ás mobilizacións do 30 de outubro en toda España pola subida salarial
✖️ Os salarios do persoal empregado público seguen conxelados. 🗣️ O Goberno retén 1.860 millóns de euros.

Se non se abre a negociación, haberá folga en decembro.

CSIF, UGT e CC.OO únense para reclamar melloras salariais e negociación real

antonio.ventura.paz — Mon, 13 Oct 25 13:15:00 CEST

Últimas noticiasGalicia - Educación Image

CSIF, UGT y CC.OO anuncian movilizacións en toda España polo bloqueo da negociación colectiva: 𝗲s𝗶x𝗶𝗺𝗼𝘀 𝘂𝗻 𝗻o𝘃𝗼 𝗮𝗰o𝗿𝗱𝗼 𝘀𝗮𝗹𝗮𝗿𝗶𝗮𝗹 𝗽𝗮𝗿𝗮 𝗼𝘀/𝗮𝘀 𝗲𝗺𝗽r𝗲g𝗮𝗱𝗼𝘀 𝗽ú𝗯𝗹𝗶𝗰𝗼𝘀

Rolda de prensa. Martes 14 de outubro. 10:00h.

As movilizacións comezarán a finais de mes por toda España e extenderanse ata final de ano, sen descartar a convocatoria dunha xornada de folga.

Seguiremos informando ao respecto!!