Galicia - Educación

Reunión coa Consellería sobre a RPT de relixión

antonio.ventura.paz — Thu, 26 Feb 26 14:39:00 CET

Negociaciones y acuerdosGalicia - Educación Image

Información sindical · Profesorado de relixión

Reunión na Consellería pola RPT do profesorado de relixión

Primeira toma de contacto para avanzar en criterios comúns en toda Galicia e evitar diferenzas entre provincias.

✅ Obxectivo da xuntanza

Establecer criterios obxectivos, claros e comúns para a vindeira RPT.
Evitar desigualdades provinciais na aplicación da RPT.
Traballar nun documento estable no tempo.

🔻 Información trasladada pola administración

Prevé publicar a RPT ao longo deste ano.
A súa aplicación sería no vindeiro curso.

📌 Apertura de listas de substitución

A Subdirección Xeral de Recursos Humanos informou da apertura das seguintes listas:

Secundaria Relixión católica
Primaria Relixión evanxélica

CSIF, sindicato maioritario no colectivo, está sempre a carón do profesorado de relixión, da dignidade do seu emprego e a súa profesión, que inclúe a dignidade da materia que impartimos.

Con estas premisas, negociaremos a nova RPT.

Que se pretende coa nova RPT?

Fixar criterios comúns e obxectivos para toda Galicia, garantindo coherencia entre provincias e unha base estable no tempo.

Que supón a apertura das listas?

Permite atender as necesidades de cobertura de prazas en secundaria nas especialidades de relixión católica e relixión evanxélica.

Información elaborada por CSIF Ensino Galicia a partir do contido trasladado na reunión.

Asinado o acordo que pon fin ás oposicións obrigatorias para o persoal consolidado

antonio.ventura.paz — Wed, 11 Feb 26 13:43:00 CET

Negociaciones y acuerdosGalicia - Educación Image

📝 ACORDO ASINADO · 11 de febreiro

Hoxe, 11 de febreiro, os sindicatos CSIF, CCOO Ensino, ANPE e UGT-SP asinamos unha addenda ao Acordo polo que se regulan as condicións de traballo do persoal docente interino e substituto, coa finalidade de que entre en vigor xa no proceso selectivo de 2026.

✅ Que cambia nas oposicións?

Elimínase para o persoal docente con posto consolidado nas listas de interinidade e substitucións a obrigatoriedade de presentarse ás oposicións para manter a súa posición na lista.
Tampouco será preciso presentarse no caso das persoas que teñan unicamente posto consolidado nas listas de Orientación de Primaria.

Aclaración: non é obrigatorio, pero quen o desexe poderá presentarse igualmente e tamén abandonar o proceso en calquera momento sen penalización nas listas.

📲 Novidades nos chamamentos de substitucións

Incorpórase o novo sistema de chamamentos de persoal substituto mediante unha aplicación informática.
Ao longo deste curso funcionará en modo de probas en determinadas especialidades con poucos chamamentos, co obxectivo de entrar en pleno funcionamento o vindeiro curso.
Regúlanse tamén as sancións por non participar no procedemento para quen estea obrigado/a a facelo.

Seguimento e garantías

Será clave unha explicación clara e completa do funcionamento da aplicación. Durante o curso 2026-2027, a comisión de seguimento do Acordo realizará un control continuado, actuando coa flexibilidade necesaria para resolver incidencias e garantir que non se produzan sancións indebidas.

Vacantes non adxudicadas

O acordo permite que as vacantes non adxudicadas se oferten a todo o persoal das listas. Así, quen estea interesado/a en traballar sen restricións poderá solicitalas de forma voluntaria, aínda que isto non dea lugar á consolidación do posto.

Consultar a Addenda ao Acordo do 20 de xuño de 1995, polo que se regulan o acceso e as condicións de traballo do persoal docente e substituto (PDF)

CSIF Ensino Galicia informará de calquera novidade e das instrucións que se publiquen para a aplicación práctica destas medidas.

CSIF , ANPE, CCOO Ensino e UGT-SP asinamos coa Consellería unha addenda ao Acordo sobre medidas de mellora

antonio.ventura.paz — Fri, 06 Feb 26 13:21:00 CET

Negociaciones y acuerdosGalicia - Educación Image

📣 Negociación · Horario lectivo

Addenda ao Acordo sobre medidas de mellora: redución do horario lectivo

CSIF, CCOO Ensino, ANPE e UGT-SP asinamos coa Consellería unha addenda ao Acordo sobre medidas de mellora para impulsar a súa aplicación efectiva e mellorar as condicións de traballo do profesorado.

📎 Documentación adxunta

Xunto a esta noticia adxúntanse para consulta:

✅ Que é?

Unha precisión técnica para garantir unha aplicación coherente do acordo, sen alterar a súa finalidade nin o contido esencial.

🔧 Que se modifica?

Elimínase a referencia ás 35 horas semanais, ao non terse producido ese cambio con carácter xeral para todo o persoal da Xunta de Galicia e, polo tanto, carecer de efectos prácticos.

🎯 O importante agora: redución do horario lectivo

Abordar a redución do horario lectivo do profesorado en Secundaria, Bacharelato, FP e Ensinanzas de Réxime Especial.

📆 Cando? Efectos previstos

Efectos previstos xa no inicio do curso 2026–2027.

📌 Tratamento na Mesa Sectorial

Calquera medida que afecte ás condicións laborais do profesorado deberá tratarse na Mesa Sectorial.

➡️ Outras demandas na comisión de seguimento

Mellor atención á diversidade.
Menos burocracia.
Redución progresiva de ratios.

Recoméndase a lectura completa da addenda e do comunicado conxunto para coñecer o alcance exacto do acordo.

ACTUALIZACIÓN RETRIBUCIÓNS 2025 E NÓMINAS 2026

antonio.ventura.paz — Fri, 09 Jan 26 11:12:00 CET

Negociaciones y acuerdosGalicia - Educación Image

Tras o acordo asinado por CSIF co Goberno de España e coa publicación do Real Decreto-lei 14/2025, procédese a actualizar as retribucións do 2025 cunha subida do 2,5% e as nóminas do 2026 cunha subida inmediata do 1,5% e unha actualización do 0,5% máis.

Consulta a infografía interactiva para ver como quedan as nóminas por corpo e experiencia:

📊

Ver Gráfico Interactivo de Retribucións

Fai clic aquí para abrir a ferramenta en pantalla completa

Abrir Informe →

Publicada a Resolución do 3 de decembro da Secretaría de Estado de Orzamentos e Gastos, pola que se ditan instrucións para dar cumprimento á parte retributiva do acordo para os anos 2025-2026 establecida no Real decreto-lei 14/2025.

antonio.ventura.paz — Wed, 17 Dec 25 10:29:00 CET

Negociaciones y acuerdosGalicia - Educación Image

CSIF, como sindicato máis representativo da función pública, asinou co Goberno de España un acordo retributivo que recolle unha suba salarial para o ano 2025 e para os tres exercicios seguintes, así como outras medidas relacionadas coas condicións laborais do conxunto das empregadas e empregados públicos e, por extensión, do persoal docente.

Ante a ausencia de Orzamentos Xerais do Estado, o Consello de Ministros do 2 de decembro aprobou o Real decreto-lei 14/2025, do 2 de decembro, polo que se aproban medidas urxentes en materia de retribucións no ámbito do sector público, publicado no Boletín Oficial do Estado do 3 de decembro. Para dar cumprimento ao establecido nesta norma, publicáronse as instrucións para a súa execución mediante a Resolución do 3 de decembro de 2025, da Secretaría de Estado de Orzamentos e Gastos, publicada no BOE do 4 de decembro, pola que se ditan instrucións sobre o pagamento ao persoal do sector público estatal do incremento retributivo do 2,5 % para o ano 2025.

Esta normativa fai efectivo o cobro dos atrasos correspondentes á suba do 2,5 % en 2025, e establece ademais unha suba do 1,5 % a partir de xaneiro de 2026, á que se poderá engadir un incremento adicional do 0,5 % no caso de que o IPC de 2026 sexa igual ou superior ao 1,5 %.

As instrucións publicadas indican que os atrasos da suba de 2025 deben aboarse no mes de decembro de 2025, e que naquelas comunidades autónomas nas que non sexa posible facelo efectivo por razóns organizativas, o pagamento deberá realizarse na primeira nómina posible.

📊 Infografía interactiva

Co obxectivo de avaliar o impacto real deste acordo nas retribucións, CSIF Educación elaborou unha infografía interactiva tomando como referencia as retribucións brutas de dous perfís de profesorado: un docente sen experiencia e outro con 15 anos de docencia. Este traballo permite visualizar de forma clara a evolución salarial e, unha vez máis, poñer de manifesto a inxustiza que supón a desigualdade salarial entre comunidades autónomas para o profesorado.

Acceso á infografía: desde aquí podes acceder á publicación de CSIF Educación Nacional, onde se amosa a infografía interactiva integrada na noticia.

Abrir infografía interactiva en CSIF Nacional

A ligazón ábrese nunha nova pestana. Se non che carga correctamente no móbil, proba a abrir no navegador ou en modo escritorio.

Por unha dignificación real da labor docente.
CSIF ENSINO

ADHESIÓN DE CSIF ENSINO Ó ACORDO DA CONSELLERÍA

antonio.ventura.paz — Tue, 09 Dec 25 11:23:00 CET

Negociaciones y acuerdosGalicia - Educación Image

CSIF Ensino decide adherirse formalmente ao Acordo sobre medidas que melloran o sistema educativo e as condicións laborais do persoal funcionario e laboral docente.

Anteriormente, a nosa posición era clara: non asinamos o acordo porque consideramos que as melloras ofrecidas, aínda que positivas, eran manifestamente insuficientes en áreas chave: redución e equidade horaria, atención á diversidade, redución da burocracia, retribucións, ratios... e, o que é fundamental, a maioría das melloras non se facían extensivas a todos os niveis do ensino.

Somos plenamente conscientes do esforzo, da dedicación e do sacrificio que todas e todos fixemos durante as mobilizacións, paros, peches e manifestacións que protagonizamos desde aquel momento para reclamar un acordo que realmente respondese ás nosas xustas demandas. A vosa resposta foi exemplar e demostrou a fortaleza e a convicción do profesorado galego.

Consideramos que, na conxuntura actual, e tras non conseguir a ansiada unidade sindical pola que CSIF Ensino loitou, tomar esta determinación responde a un exercicio de responsabilidade. A Consellería abriu a porta a escoitarnos e cremos que actualmente a presión é máis efectiva desde dentro, cara a cara, a través das mesas de negociación que mediante a protesta externa.

A nosa postura é firme: priorizamos a vía negociadora por considerala o instrumento máis eficiente para a defensa dos vosos intereses neste momento.

Non obstante, que ninguén se confunda: isto é unha tregua para construír, non un cheque en branco. O cumprimento do pactado será sometido a unha estrita vixilancia; no caso de que a Administración non cumpra os seus compromisos, CSIF Ensino sairá do Acordo e reactivará as mobilizacións, coa lexitimidade engadida de quen esgotou a vía do diálogo.

Seguimos traballando por e para vós.

CSIF Ensino Galicia

CALCULA A TÚA SUBIDA SALARIAL

antonio.ventura.paz — Fri, 05 Dec 25 11:33:00 CET

Negociaciones y acuerdosGalicia - Educación Image

Calculadora de Suba Salarial 2025-2028

Introduce teu soldo mensual actual

Incremento Acumulado (2025-2028)

0,00 €

AVISO IMPORTANTE: Os seguintes resultados son orientativos e estarán afectados no seu caso ás posibles modificacións de retencións e ás circunstancias familiares e persoais de cada traballador ou traballadora.

CSIF SÍ LEVA ANOS TOMANDO ACIÓNS PARA RECUPERAR A TÚA PAGA EXTRA…

antonio.ventura.paz — Thu, 27 Nov 25 23:57:00 CET

Negociaciones y acuerdosGalicia - Educación Image

Nos últimos días seguro que che chegou algunha mensaxe dicindo que podes reclamar o cobro do 100 % das pagas extraordinarias. Dende CSIF queremos explicar, con claridade, que din realmente esas sentenzas, como se calculan hoxe as pagas extraordinarias na función pública e que marxe real existe para reclamalas no caso do profesorado.

🔎 Ten en conta o seguinte

A información que circula non é correcta. Úsase a sentenza do Supremo para prometer unha “paga extra completa” cando a sentenza non di iso.
A sentenza non fala de pagas extra: trata de pluses (noites, festivos, quendas) en vacacións, baixas e IT; nunca de cobrar máis nas extras de xuño e decembro.
Non é aplicable directamente ao profesorado galego: é un caso de Policía Local e non recoñece para docentes o dereito a cobrar o incentivo de avaliación na paga extra.
As reclamacións masivas de “paga extra completa” teñen moi poucas opcións de éxito mentres as Leis de Orzamentos sigan igual.
CSIF leva anos traballando para recuperar a paga extra (negociación, emendas, ILP, recurso ao Constitucional e mobilización), sen cobrar nin esixir afiliación obrigatoria.

1) Que din de verdade as sentenzas do Supremo do 25/06/2025?

Resolven varios recursos de funcionarios da Policía Local de Vigo que traballan por quendas con noites e festivos. O Supremo fixa tres ideas:

Se nocturnidade e festividade forman parte da quenda ordinaria, eses pluses son retribucións fixas e periódicas inherentes ao posto.
Débense cobrar tamén durante vacacións, incapacidade temporal e permisos retribuídos, aínda que nese período non se traballe de noite ou en festivo.
Pódense reclamar cantidades atrasadas dentro do prazo xeral de prescrición de 4 anos.

Importante: estas sentenzas non recoñecen o dereito a cobrar eses pluses nas pagas extraordinarias nin analizan a súa estrutura. O debate que resolven é sobre vacacións, IT e permisos retribuídos, non sobre as extras de xuño e decembro.

2) Como se calculan hoxe as pagas extraordinarias do persoal funcionario?

Na función pública a estrutura das pagas extraordinarias vén regulada no art. 22.4 do EBEP (Real Decreto Lexislativo 5/2015):

Unha mensualidade de retribucións básicas (soldos e trienios) + a totalidade das retribucións complementarias, agás produtividade e gratificacións por servizos extraordinarios.

Porén, dende 2010 as Leis de Orzamentos Xerais do Estado veñen fixando importes pechados e inferiores aos que resultarían de aplicar literalmente o EBEP (soldos e trienios “reducidos” nas extras).

Por iso CSIF reclama recuperar a estrutura salarial previa a 2010 e calcular as extras conforme ao EBEP, sen recortes encubertos vía Orzamentos.

3) Que pasa coas campañas que prometen “paga extra completa” a raíz do Supremo?

As sentenzas non falan de pagas extraordinarias nin obrigan a cambiar o cálculo actual.
Vincular esas sentenzas cun suposto dereito inmediato á “paga extra completa” é unha interpretación errónea que xera expectativas non avaladas pola normativa vixente.
Mentres sigan vixentes as Leis de Orzamentos que marcan a contía das extras, as posibilidades de éxito dunha reclamación masiva para “completalas” son moi reducidas.

Como organización seria e responsable, CSIF non recomenda adherirse a campañas xeneralistas deste tipo baseadas unicamente nestas sentenzas.

4) E no caso do profesorado: incentivo de avaliación docente e paga extra?

Situación actual:

A normativa galega configura o incentivo como contía mensual ligada á avaliación positiva.
Na práctica, trátase como produtividade: págase mes a mes, pero non se integra nas pagas extraordinarias.

Desde o punto de vista xurídico:

Pódese argumentar que, unha vez concedido, é un complemento estable e reiterado.
Porén, hoxe non existe xurisprudencia específica que obrigue a incluilo nas extras (en Galicia nin no resto do Estado).

Polo tanto, non existe un dereito claro e consolidado a percibilo na paga extra, aínda que poidan formularse debates e reclamacións puntuais.

5) Que está facendo CSIF para recuperar a paga extra íntegra?

Reivindicación: recuperación da paga extra completa e aplicación real do art. 22.4 do EBEP.
Negociación institucional na Mesa Xeral para que as extras inclúan o que marca a lei.
Emendas aos PGE para que as pagas extra recollan o 100 % das retribucións básicas e complementarias.
Mobilización nos centros: campañas e recollida de sinaturas.
ILP (2023) para derrogar os recortes do RD-lei 8/2010 e recuperar as pagas íntegras.
Recurso ao Tribunal Constitucional admitido a trámite tras o rexeitamento da ILP no Congreso.
Presión continua: mobilizacións e petición de negociación urxente en todo o país.

6) Pódese facer unha reclamación a nivel individual?

Revisar o caso concreto é lexítimo, pero cómpre facelo con realismo sobre as probabilidades.

As sentenzas citadas non crean un dereito inmediato á “paga extra completa”.
Mentres as Leis de Orzamentos marquen a contía, a viabilidade dunha reclamación masiva é baixa.
Campañas con expectativas irreais rematan por perxudicar futuras reivindicacións serias.

CSIF aposta por información rigorosa, acompañamento xurídico serio e estratexia negociadora para lograr cambios efectivos.

7) O compromiso de CSIF

CSIF leva anos tomando accións para recuperar a túa paga extra sen esixir nin un euro nin afiliación obrigatoria.

Damosche información completa e mantemos o compromiso de sempre: rigurosidade xurídica, realismo nas expectativas e defensa profesional, seria e independente, dos dereitos do persoal empregado público.

CSIF traballa por unha unidade sindical que finalmente non foi posible acadar

antonio.ventura.paz — Mon, 17 Nov 25 12:19:00 CET

Negociaciones y acuerdosGalicia - Educación Image

Unidade sindical

Ensino público

Profesorado en Galicia

Nas últimas semanas, o profesorado galego trasladou un profundo descontento pola falta de unidade entre as organizacións sindicais do sector educativo. A comunidade docente demanda, cada vez con máis forza, que as iniciativas e mobilizacións se articulen desde unha posición común que permita defender con maior eficacia os seus dereitos, condicións laborais e a calidade do ensino público.

Ante esta situación, CSIF Ensino Galicia deu o paso de promover un proceso real de achegamento entre as distintas organizacións do ámbito sindical educativo. Co obxectivo claro de explorar vías de consenso e avanzar cara a un escenario de unidade, CSIF impulsou e participou nunha serie de reunións formais con diferentes entidades sindicais presentes no panorama docente galego.

Durante estes encontros, analizáronse puntos en común, propostas compartidas e posibles liñas de acción conxunta. CSIF defendeu en todo momento a necesidade de trasladar ao profesorado unha mensaxe sólida e unificada, especialmente nun contexto no que o sector reclama acordos amplos e unha posición común ante a Administración.

Porén, a pesar do esforzo realizado e da vontade manifesta de CSIF por avanzar neste camiño, non foi posible acadar finalmente unha unidade sindical plena. As diferenzas de estratexia, enfoque e prioridades entre varias organizacións impediron pechar un acordo sólido que permitise articular accións conxuntas inmediatas.

Aínda así, CSIF Ensino Galicia reafirma o seu compromiso co diálogo, coa responsabilidade e coa defensa firme do profesorado. Continuaremos traballando para que o sistema educativo galego conte cun sindicalismo construtivo, profesional e orientado ás necesidades reais dos centros e do persoal docente.

O noso compromiso coa comunidade educativa mantense intacto, e seguiremos apostando por canles de colaboración e entendemento sempre que existan opcións reais de avanzar.