Galicia - Educación

Valoración sindical do Plan para o impulso da atención á diversidade

antonio.ventura.paz — Tue, 02 Jun 26 17:42:00 CEST

Negociaciones y acuerdosGalicia - Educación Image

Comunicado conxunto de CSIF, CCOO Ensino, ANPE e UGT-SP sobre as medidas anunciadas pola Consellería de Educación.

As organizacións sindicais CSIF, CCOO Ensino, ANPE e UGT-SP valoramos positivamente que a atención á diversidade se sitúe no centro da axenda educativa galega, entendéndoa como unha prioridade estratéxica para garantir unha educación inclusiva e de calidade.

Un plan necesario para a realidade actual dos centros

As organizacións sindicais CSIF, CCOO Ensino, ANPE e UGT-SP , no marco do traballo conxunto que vimos desenvolvendo nos últimos anos en defensa da mellora do ensino público galego e das condicións laborais do seu persoal, especialmente a través do Acordo sobre medidas de mellora do sistema educativo valoramos positivamente que a atención á diversidade se sitúe no centro da axenda educativa galega.

O "Plan para o impulso da atención á diversidade" é necesario, chega nun momento importante e debe servir para dar resposta a unha realidade que os centros educativos levan anos trasladando con claridade: cada curso medran as necesidades do alumnado, medran as situacións complexas nas aulas e medra tamén a esixencia profesional sobre o profesorado, os departamentos de orientación, o persoal especialista e o persoal non docente.

A escola galega é hoxe máis diversa, e iso é unha riqueza. Pero para que esa diversidade sexa realmente unha oportunidade e non unha fonte de desigualdade, fan falta recursos, organización, estabilidade e vontade de escoitar a quen está cada día nos centros.

Por iso queremos partir dunha idea que expresada polo propio Conselleiro, todos os recursos que se doten van ser sempre insuficientes. E precisamente por iso non podemos conformarnos. Esa afirmación non debe servir para rebaixar a esixencia, senón para reforzala. Porque a atención á diversidade non é unha actuación puntual nin unha campaña dun curso; é unha obriga permanente do sistema educativo e unha condición imprescindible para garantir o dereito á educación en igualdade de oportunidades.

Avances que valoramos positivamente

Neste sentido, queremos poñer en valor varias das medidas recollidas no plan. O reforzo dos servizos de orientación, coa incorporación de 50 novos orientadores e orientadoras, o incremento de 100 profesionais de Pedagoxía Terapéutica na ESO no curso 2026/27 e outros 100 no 2027/28, a consolidación de postos de PT e Audición e Linguaxe en Primaria, a actualización normativa, a formación específica, a redución da burocracia e a mellora das ferramentas de xestión son pasos importantes que poden ter un impacto positivo se se aplican ben, se chegan a todos os centros que o precisan e se se manteñen no tempo.

Agora ben, debemos entender estas medidas como un bo punto de partida e non como un punto de chegada...

Do mesmo xeito, os 200 novos efectivos de Pedagoxía Terapéutica anunciados constitúen un avance relevante...

Ademais, cómpre lembrar que as melloras incorporadas ao Acordo de catálogos do profesorado permiten avanzar na dotación estrutural destes recursos...

A inclusión non pode estar condicionada por teitos administrativos de dotación de persoal, senón polas necesidades educativas efectivamente existentes nos centros.

O persoal auxiliar coidador: unha cuestión prioritaria

Tamén queremos lembrar que algunhas das medidas que hoxe se presentaron conectan directamente co traballo desenvolvido nos últimos anos no marco do Acordo sobre medidas de mellora do sistema educativo galego...

Pero hoxe tamén queremos trasladar unha mensaxe clara: un plan non pode quedar nun documento. Ten que notarse nas aulas, nos patios, nos comedores, nos departamentos de orientación, nas familias e nas condicións laborais do persoal.

E aquí hai unha cuestión especialmente sensible: a dotación de persoal auxiliar coidador...

O que vivimos a comezos deste curso en distintos centros educativos galegos non pode repetirse...

Por iso, neste punto, queremos ser especialmente firmes. Cómpre garantir persoal coidador suficiente, con criterios claros, con substitucións áxiles, con estabilidade nas contratacións e con pleno respecto aos dereitos das persoas traballadoras.

Compromiso sindical

As catro organizacións sindicais temos unha responsabilidade: dialogar, propoñer, negociar e chegar a acordos cando estes supoñen avances para o ensino público galego.

Ese vai ser o noso papel tamén con este plan. Queremos que funcione. Queremos que se implemente ao 100 %. Queremos que sirva para mellorar a atención ao alumnado e tamén para mellorar as condicións do profesorado, dos equipos de orientación, do persoal especialista e do persoal non docente.

Porque a inclusión educativa non se proclama: constrúese. Con recursos. Con planificación. Con profesionais suficientes. Con estabilidade. Con menos burocracia. Con coordinación. E co recoñecemento de todo o persoal que sostén cada día os centros educativos.

En resumo, este plan pode ser unha oportunidade importante para avanzar. Pero esa oportunidade só será real se chega a cada centro, a cada aula e a cada alumno ou alumna que precisa apoio. A nosa disposición ao diálogo é total. A nosa esixencia tamén.

Medidas consolidadas para mellorar o ensino público galego froito do diálogo e da negociación

antonio.ventura.paz — Fri, 29 May 26 19:13:00 CEST

Negociaciones y acuerdosGalicia - Educación Image

CSIF, CCOO Ensino, ANPE e UGT-SP asinamos coa Consellería de Educación unha addenda ao Acordo sobre Medidas de Mellora e unha modificación do Acordo de Catálogos de Infantil e Primaria que consolidan avances fundamentais para o profesorado e para a calidade do ensino público galego.

Hoxe damos un novo paso adiante no desenvolvemento do Acordo sobre Medidas de Mellora do sistema educativo público non universitario de Galicia.

A sinatura da addenda ao Acordo e da modificación do Acordo de Catálogos de Educación Infantil e Primaria (que databa do 2007) permite garantir novas medidas estruturais que melloran as condicións de traballo do profesorado, reforzan a atención educativa ao alumnado e consolidan emprego docente estable nos centros públicos galegos. Todo isto nun contexto de descenso da natalidade, pero ao mesmo tempo, de notable incremento das necesidades educativas do alumnado.

En concreto, o acordo asinado hoxe garante:

A recuperación das 18 sesións lectivas para o profesorado de Secundaria, Bacharelato, Formación Profesional e ensinanzas tanto de réxime especial como de persoas adultas, mellorando as condicións existentes con anterioridade ao ano 2012.
A fixación de 23 sesións (como máximo) de permanencia semanal no centro, avanzando cara a unha organización horaria máis equilibrada e homologable ás mellores condicións existentes no Estado.
O recoñecemento, por primeira vez, da función titorial con redución de horario lectivo, unha demanda histórica do profesorado e das organizacións asinantes.
A mellora da regulación horaria das funcións de coordinación, responsabilidades organizativas e atención ás necesidades reais dos centros.
A modificación do Acordo de Catálogos de Infantil e Primaria de 2007, que permitirá incrementar o profesorado permanente e estable de Pedagoxía Terapéutica e Audición e Linguaxe. Coa consolidación de máis persoal especialista de atención á diversidade, reducindo a dependencia de reforzos conxunturais e dando estabilidade aos cadros de persoal dos centros.

Estas medidas non son unha retaíla de demandas, nin unha declaración de intencións, nin unha promesa pendente de desenvolvemento futuro. Son acordos asinados, con aplicación inmediata en Galicia para o curso 26/27, froito da negociación colectiva e do traballo continuado das organizacións sindicais asinantes.

Nun momento no que a redución dos horarios lectivos e das ratios forma parte do debate estatal, Galicia adiántase e garante por acordo medidas que aínda non están aprobadas no ámbito do Estado. O proxecto de lei estatal continúa a súa tramitación parlamentaria con serias dificultades e, polo tanto, non existe neste momento ningunha garantía de que esas medidas se aproben finalmente nos termos previstos nin nos prazos anunciados.

Fronte á incerteza estatal, en Galicia hai acordo, hai calendario e hai medidas concretas.

Tamén nun contexto no que noutros territorios se enquistan situacións de folga, conflito aberto e falta de acordo arredor das condicións de traballo do profesorado, as organizacións asinantes demostramos que a negociación seria, constante e sostida no tempo permite acadar avances reais para os centros, para o profesorado e para o alumnado na nosa comunidade.

A mobilización e a presión sindical son ferramentas lexítimas e necesarias cando serven para abrir camiños de negociación. Pero os dereitos consolídanse cando as reivindicacións se transforman en acordos asinados, en normas aplicables e en melloras efectivas nos centros educativos.

O acordo de hoxe dá continuidade ao camiño iniciado e consolida avances que xa permitiron frear recortes, evitar o peche de aulas, reforzar o emprego docente, reducir horarios lectivos, avanzar na redución de ratios, mellorar retribucións e fortalecer a atención á diversidade; agora dáse un novo paso coa recuperación das 18 sesións lectivas en Secundaria, FP e ensinanzas de réxime especial, o recoñecemento horario da función titorial e o incremento estable de profesorado de PT e AL, medidas que melloran a organización do traballo docente, reforzan a atención ao alumnado e consolidan unha resposta máis eficaz e continuada ás necesidades educativas dos centros.

As organizacións asinantes valoramos especialmente que estas medidas teñan carácter estrutural. Non falamos de parches nin de actuacións illadas, senón de cambios que modifican a organización do sistema e que terán impacto directo no funcionamento dos centros públicos galegos.

Este acordo é froito da unidade sindical de CSIF, CCOO Ensino, ANPE e UGT-SP no marco do Acordo sobre Medidas de Mellora. Unha unidade construída arredor de obxectivos concretos, propostas viables e traballo negociador rigoroso. Unha unidade sempre aberta a seguir sumando, pero centrada en conseguir resultados útiles para o profesorado e para o ensino público.

Queda traballo por facer. Seguiremos reclamando novas melloras na redución de ratios, na atención á diversidade, na redución da burocracia, na organización dos centros, na saúde laboral, nas condicións do profesorado de todas as etapas e na dotación de medios humanos suficientes.

Pero hoxe é un día importante para o ensino público galego.

Porque o que durante anos foi unha demanda sindical e profesional pasa a converterse en acordo asinado.

Porque Galicia garante medidas que noutros lugares aínda son obxecto de conflito ou de tramitación incerta.

E porque demostramos que a negociación colectiva, cando se exerce con responsabilidade, firmeza e unidade, mellora as condicións laborais do profesorado e reforza a calidade do ensino público.

CSIF, CCOO Ensino, ANPE e UGT-SP seguiremos traballando para completar o desenvolvemento do Acordo sobre Medidas de Mellora e para continuar avanzando nun ensino público galego con máis profesorado, mellores condicións laborais e máis recursos para atender mellor o alumnado.

```

Novo Plan para o impulso da atención á diversidade

antonio.ventura.paz — Tue, 26 May 26 01:26:00 CEST

Negociaciones y acuerdosGalicia - Educación Image

26 de maio de 2026

As organizacións asinantes reclamamos agora concreción normativa, calendario claro, criterios transparentes de dotación e seguimento sindical para garantir que os recursos cheguen aos centros que máis os precisan.

CSIF, CCOO Ensino, ANPEE e UGT-SP valoramos positivamente o anuncio realizado pola Xunta de Galicia sobre o novo Plan para o impulso da atención á diversidade, que supón un novo avance no desenvolvemento das medidas de mellora do ensino público galego a través do diálogo coa Consellería de Educación.

Este Plan non xorde da improvisación nin dun anuncio illado. Forma parte da liña de traballo aberta no marco do Acordo sobre Medidas de Mellora asinado en 2023 e das novas propostas consensuadas coas organizacións sindicais asinantes para ampliar os avances tamén á etapa de Secundaria, Bacharelato, Formación Profesional e ensinanzas de réxime especial.

Un reforzo necesario para a atención á diversidade

A atención á diversidade foi, desde o inicio, unha prioridade sindical, porque é unha das necesidades máis evidentes dos centros e unha das principais demandas do profesorado e das familias.

O anuncio dun reforzo e consolidación de persoal especialista supón un paso relevante:

Incorporación progresiva de profesionais de Pedagoxía Terapéutica na ESO.
Estabilización de postos de Pedagoxía Terapéutica e Audición e Linguaxe en Infantil e Primaria.
Reforzo dos servizos de orientación.

Esta medida ten especial importancia porque aposta por recursos estruturais, non por solucións puntuais ou precarias.

A mellora da atención á diversidade require persoal estable, planificación, coordinación e tempo profesional suficiente nos centros. Por iso, este Plan debe entenderse tamén en relación co resto de medidas xa anunciadas: recuperación das 18 sesións lectivas en Secundaria, Bacharelato, FP e ensinanzas de réxime especial; recoñecemento horario da función titorial; incremento da dotación horaria dos equipos directivos; e adianto da redución de ratios na ESO ao curso 2028/29.

Reclamamos concreción e garantías

Consideramos que o anuncio é positivo, mais lembramos que agora é imprescindible concretar a súa aplicación. Reclamamos que a Consellería negocie canto antes:

As correspondentes modificacións normativas.
O calendario de implantación.
Os criterios de distribución dos novos efectivos.
Os mecanismos de seguimento do Plan.

Criterios obxectivos e transparentes

A asignación de recursos debe realizarse con criterios obxectivos, transparentes e vinculados ás necesidades reais dos centros:

Volume de alumnado con necesidades específicas de apoio educativo.
Complexidade socioeducativa.
Dispersión territorial.
Carga dos departamentos de orientación.
Número de unidades.
Características de cada etapa educativa.

Menos burocracia e máis tempo para atender ao alumnado

A redución da burocracia anunciada debe traducirse en medidas reais e avaliables. A dixitalización e as novas ferramentas de xestión só serán útiles se serven para liberar tempo profesional, mellorar a coordinación e permitir que orientadores, equipos docentes e profesorado especialista poidan centrarse no acompañamento educativo, na intervención directa, na adaptación de materiais e probas e na resposta ás necesidades do alumnado.

As organizacións asinantes reiteramos que este avance demostra a utilidade da negociación colectiva. O diálogo sostido, o traballo sindical responsable e a unidade das organizacións asinantes están permitindo consolidar melloras reais nos centros.

Seguiremos traballando para que o Plan para o impulso da atención á diversidade se desenvolva con garantías, para que os recursos anunciados cheguen onde máis se necesitan e para que o ensino público galego continúe avanzando en equidade, inclusión e calidade.

Convocada a Mesa Sectorial de Ensino para tratar a xornada semanal docente do curso 2026-2027

antonio.ventura.paz — Tue, 12 May 26 10:19:00 CEST

Negociaciones y acuerdosGalicia - Educación Image

CSIF destaca a importancia dos asuntos incluídos na orde do día para o profesorado galego.

CSIF Ensino informa

A Consellería de Educación convocou unha nova sesión da Mesa Sectorial Docente Non Universitaria, que se celebrará o mércores 13 de maio de 2026.

Entre os asuntos máis destacados figura a Resolución conxunta sobre a xornada semanal do persoal docente no curso académico 2026-2027, así como a aprobación da Orde do calendario escolar 2026-2027.

Todos os documentos incluídos na orde do día poden consultarse directamente neste artigo.

📅 Data de celebración da Mesa Sectorial: mércores, 13 de maio de 2026.

Orde do día

1. Aprobación, se procede, das actas anteriores.

2. Orde do concurso de dirección do Centro Residencial Docente de Ourense.

Consultar documento

3. Orde do calendario escolar 2026-2027.

A Mesa Sectorial abordará a aprobación do calendario escolar do vindeiro curso académico.

Descargar orde do calendario escolar

4. Resolución conxunta sobre a xornada semanal do persoal docente no curso académico 2026-2027.

Este será un dos puntos centrais da Mesa Sectorial, xa que afecta á organización da xornada semanal do profesorado para o próximo curso.

Consultar resolución sobre xornada semanal

5. Rolda final de intervencións.

CSIF Ensino Galicia continuará informando sobre o desenvolvemento desta Mesa Sectorial e trasladará todas as novidades que afecten ás condicións laborais e organizativas do profesorado galego.

CSIF, CCOO Ensino, ANPE e UGT-SP celebran o paso pola Mesa Sectorial das novas medidas de mellora do ensino público galego

antonio.ventura.paz — Thu, 07 May 26 11:30:00 CEST

Negociaciones y acuerdosGalicia - Educación Image

Comunicado CSIF Ensino

As organizacións asinantes destacamos que as propostas desenvolven o Acordo sobre medidas de mellora, respectan a negociación colectiva e permitirán aplicar novos avances desde o curso 2026/27.

CSIF, CCOO Ensino, ANPE e UGT-SP valoramos positivamente que se inicie o paso pola Mesa Sectorial das primeiras medidas froito do traballo desenvolvido na comisión de seguimento do Acordo sobre medidas que melloran o funcionamento do sistema educativo e as condicións laborais do persoal docente , publicado no DOG en xaneiro de 2024.

Fronte á desinformación interesada, queremos lembrar que sempre defendemos que estas propostas debían pasar polos órganos correspondentes de negociación. E iso é precisamente o que se está facendo.

As medidas supoñen avances moi relevantes para o ensino público galego:

Recuperación das 18 sesións lectivas en Secundaria, Bacharelato, FP e ensinanzas de réxime especial.
Recoñecemento horario da función titorial.
Reforzo dos equipos directivos.
Máis atención á diversidade.

Respectamos a lexitimidade de todas as mobilizacións e folgas en defensa do ensino público, mais entendemos que a mobilización debe servir para abrir negociacións e conseguir resultados. Con este fito, está demostrado que este marco de diálogo comeza a traducirse en melloras concretas.

Lamentamos que se tente presentar estes avances como unha concesión unilateral da Consellería, como unha renuncia ás reivindicacións do profesorado ou como consecuencia dun proxecto de lei estatal aínda sen garantías de aprobación.
Estas medidas son froito da negociación sostida e da decisión responsable de manter vivo un Acordo que xa permitiu frear recortes, reducir ratios, consolidar emprego docente, mellorar retribucións e recuperar horario lectivo en Infantil e Primaria; e agora, por fin, facerse extensivo ao resto das ensinanzas.

A posición é clara: nin propaganda, nin confrontación estéril, nin parálise. Seguiremos defendendo as melloras pendentes e esixindo garantías para que cada avance se traduza en máis profesorado, máis apoios e mellores condicións nos centros.

Desde CSIF seguiremos na mobilización cando sexa necesaria, na negociación sempre que sexa posible e na defensa do ensino público todos os días.

📄 Consultar borrador da Resolución sobre a xornada docente 2026/27

Reunión coa Consellería sobre a RPT de relixión

antonio.ventura.paz — Thu, 26 Feb 26 14:39:00 CET

Negociaciones y acuerdosGalicia - Educación Image

Información sindical · Profesorado de relixión

Reunión na Consellería pola RPT do profesorado de relixión

Primeira toma de contacto para avanzar en criterios comúns en toda Galicia e evitar diferenzas entre provincias.

✅ Obxectivo da xuntanza

Establecer criterios obxectivos, claros e comúns para a vindeira RPT.
Evitar desigualdades provinciais na aplicación da RPT.
Traballar nun documento estable no tempo.

🔻 Información trasladada pola administración

Prevé publicar a RPT ao longo deste ano.
A súa aplicación sería no vindeiro curso.

📌 Apertura de listas de substitución

A Subdirección Xeral de Recursos Humanos informou da apertura das seguintes listas:

Secundaria Relixión católica
Primaria Relixión evanxélica

CSIF, sindicato maioritario no colectivo, está sempre a carón do profesorado de relixión, da dignidade do seu emprego e a súa profesión, que inclúe a dignidade da materia que impartimos.

Con estas premisas, negociaremos a nova RPT.

Que se pretende coa nova RPT?

Fixar criterios comúns e obxectivos para toda Galicia, garantindo coherencia entre provincias e unha base estable no tempo.

Que supón a apertura das listas?

Permite atender as necesidades de cobertura de prazas en secundaria nas especialidades de relixión católica e relixión evanxélica.

Información elaborada por CSIF Ensino Galicia a partir do contido trasladado na reunión.

Asinado o acordo que pon fin ás oposicións obrigatorias para o persoal consolidado

antonio.ventura.paz — Wed, 11 Feb 26 13:43:00 CET

Negociaciones y acuerdosGalicia - Educación Image

📝 ACORDO ASINADO · 11 de febreiro

Hoxe, 11 de febreiro, os sindicatos CSIF, CCOO Ensino, ANPE e UGT-SP asinamos unha addenda ao Acordo polo que se regulan as condicións de traballo do persoal docente interino e substituto, coa finalidade de que entre en vigor xa no proceso selectivo de 2026.

✅ Que cambia nas oposicións?

Elimínase para o persoal docente con posto consolidado nas listas de interinidade e substitucións a obrigatoriedade de presentarse ás oposicións para manter a súa posición na lista.
Tampouco será preciso presentarse no caso das persoas que teñan unicamente posto consolidado nas listas de Orientación de Primaria.

Aclaración: non é obrigatorio, pero quen o desexe poderá presentarse igualmente e tamén abandonar o proceso en calquera momento sen penalización nas listas.

📲 Novidades nos chamamentos de substitucións

Incorpórase o novo sistema de chamamentos de persoal substituto mediante unha aplicación informática.
Ao longo deste curso funcionará en modo de probas en determinadas especialidades con poucos chamamentos, co obxectivo de entrar en pleno funcionamento o vindeiro curso.
Regúlanse tamén as sancións por non participar no procedemento para quen estea obrigado/a a facelo.

Seguimento e garantías

Será clave unha explicación clara e completa do funcionamento da aplicación. Durante o curso 2026-2027, a comisión de seguimento do Acordo realizará un control continuado, actuando coa flexibilidade necesaria para resolver incidencias e garantir que non se produzan sancións indebidas.

Vacantes non adxudicadas

O acordo permite que as vacantes non adxudicadas se oferten a todo o persoal das listas. Así, quen estea interesado/a en traballar sen restricións poderá solicitalas de forma voluntaria, aínda que isto non dea lugar á consolidación do posto.

Consultar a Addenda ao Acordo do 20 de xuño de 1995, polo que se regulan o acceso e as condicións de traballo do persoal docente e substituto (PDF)

CSIF Ensino Galicia informará de calquera novidade e das instrucións que se publiquen para a aplicación práctica destas medidas.

CSIF , ANPE, CCOO Ensino e UGT-SP asinamos coa Consellería unha addenda ao Acordo sobre medidas de mellora

antonio.ventura.paz — Fri, 06 Feb 26 13:21:00 CET

Negociaciones y acuerdosGalicia - Educación Image

📣 Negociación · Horario lectivo

Addenda ao Acordo sobre medidas de mellora: redución do horario lectivo

CSIF, CCOO Ensino, ANPE e UGT-SP asinamos coa Consellería unha addenda ao Acordo sobre medidas de mellora para impulsar a súa aplicación efectiva e mellorar as condicións de traballo do profesorado.

📎 Documentación adxunta

Xunto a esta noticia adxúntanse para consulta:

✅ Que é?

Unha precisión técnica para garantir unha aplicación coherente do acordo, sen alterar a súa finalidade nin o contido esencial.

🔧 Que se modifica?

Elimínase a referencia ás 35 horas semanais, ao non terse producido ese cambio con carácter xeral para todo o persoal da Xunta de Galicia e, polo tanto, carecer de efectos prácticos.

🎯 O importante agora: redución do horario lectivo

Abordar a redución do horario lectivo do profesorado en Secundaria, Bacharelato, FP e Ensinanzas de Réxime Especial.

📆 Cando? Efectos previstos

Efectos previstos xa no inicio do curso 2026–2027.

📌 Tratamento na Mesa Sectorial

Calquera medida que afecte ás condicións laborais do profesorado deberá tratarse na Mesa Sectorial.

➡️ Outras demandas na comisión de seguimento

Mellor atención á diversidade.
Menos burocracia.
Redución progresiva de ratios.

Recoméndase a lectura completa da addenda e do comunicado conxunto para coñecer o alcance exacto do acordo.

ACTUALIZACIÓN RETRIBUCIÓNS 2025 E NÓMINAS 2026

antonio.ventura.paz — Fri, 09 Jan 26 11:12:00 CET

Negociaciones y acuerdosGalicia - Educación Image

Tras o acordo asinado por CSIF co Goberno de España e coa publicación do Real Decreto-lei 14/2025, procédese a actualizar as retribucións do 2025 cunha subida do 2,5% e as nóminas do 2026 cunha subida inmediata do 1,5% e unha actualización do 0,5% máis.

Consulta a infografía interactiva para ver como quedan as nóminas por corpo e experiencia:

📊

Ver Gráfico Interactivo de Retribucións

Fai clic aquí para abrir a ferramenta en pantalla completa

Abrir Informe →