Día Internacional contra o Acoso Escolar

2 de maio de 2026 · “Rompe o silencio, detén o acoso”

CSIF manifesta, con motivo do Día Internacional contra o Acoso Escolar, o seu compromiso firme cunha escola segura, inclusiva e libre de calquera forma de violencia, hostigamento, intimidación, illamento ou ciberacoso.

CSIF esixe máis recursos, formación en horario lectivo, apoio legal e reforzo da autoridade do profesorado para previr e combater o acoso escolar.

O acoso escolar non pode normalizarse, minimizarse nin ocultarse. Romper o silencio implica escoitar á vítima, activar respostas inmediatas, protexer o alumnado vulnerable e respaldar ás persoas que están na primeira liña nos centros educativos.

Esta realidade afecta directamente ao benestar emocional, á aprendizaxe, á saúde mental e á convivencia diaria nos centros. Tamén repercute no traballo do profesorado, dos equipos directivos, da orientación educativa e do conxunto de profesionais que sosteñen a escola pública.

Datos que obrigan a actuar

9,53% do alumnado de Primaria manifestou ter sufrido acoso escolar.

9,2% declarou ter sufrido ciberacoso.

30,91% do alumnado avisa a un profesor ou profesora ante unha situación de bullying.

90% do profesorado bota en falta apoio da Administración educativa.

Segundo a enquisa nacional de CSIF “Xa está ben! Pola dignificación do labor docente”, realizada a 7.547 docentes en activo de centros públicos, o clima de convivencia e o respaldo institucional amosan unha deterioración preocupante.

O 72,2% do profesorado non se sente respectado nin recoñecido no seu labor, o 56,3% afirma ter sufrido agresións ou trato vexatorio no último ano e o 97,8% considera que os protocolos actuais de convivencia non son útiles para o día a día das aulas.

Reivindicacións de CSIF

Reforzo da autoridade do profesorado

Con respaldo expreso da Administración cando o persoal docente activa protocolos, comunica situacións de risco ou intervén ante conflitos.

Formación específica en horario lectivo

Práctica, actualizada e adaptada a cada etapa educativa, con ferramentas reais para detectar, intervir e acompañar.

Apoio legal e técnico inmediato

Para equipos directivos, docentes, orientación educativa e inspección, evitando que os centros afronten sós situacións complexas.

Máis orientación e máis recursos humanos

Con persoal suficiente, coordinación de benestar, apoios especializados e redución de ratios para mellorar a atención individualizada.

Protocolos máis áxiles e menos burocráticos

Con prazos claros, actuacións inmediatas, protección efectiva da vítima e seguimento posterior das medidas adoptadas.

Compromiso real fronte ao acoso escolar

Mirar cara a outro lado ou relativizar os feitos agrava o dano e transmite á vítima unha mensaxe inaceptable de desprotección.

CSIF lembra que a prevención do acoso escolar require unha actuación coordinada de toda a comunidade educativa, pero esa coordinación só é posible se as administracións proporcionan tempo, formación, persoal especializado, respaldo xurídico e recursos suficientes.

O profesorado non pode ser sinalado como único responsable dunha problemática social que moitas veces desborda a aula, mais tampouco pode ser apartado da solución. O docente debe ser recoñecido como peza clave na detección precoz, na protección do alumnado e na construción diaria dun clima escolar seguro.

Romper o silencio esixe unha resposta colectiva. Deter o acoso esixe recursos, responsabilidade institucional e apoio real ao profesorado.